Itanong Mo Sa Akin
Itanong Sa Akin
Gusto kong tanungin mo ako kung nasaan ako
Sasabihing di naman umalis at lagi lang sa tabi mo
Bubulong ng mahina, hahawakan ang kamay mo
Aakbay sa mga bisig mo, isasama ka sa aking mundo.
Gusto kong sagutin ang tanong na ito
Nang tuluyang mawala ang pagdududa mo At malamang ikaw ang gusto kong kasalo sa mga oras na ito At sa mga araw na darating pa sa buhay ko.
Gusto kong tanungin mo ako kung kumain na ba ako Sagot koy hinihintay kitang yayain ako sa kainang paborito Ipaglalagay ng kanin at ulam sa iyong plato Ipagbubuhos ng inumin sa iyong gamit na baso.
Gusto kong sagutin ang tanong na ito
Nang tuluyang malaman mo na basta't kasama kita'y busog na ako Na sa bawat subo ko ang iniiisip ko'y ang pagmamahal mo At paano matatanggal lahat ng agam agam sa isip mo.
Gusto kong tanungin mo ako kung anong ginagawa ko Ng sa gayo'y malaman mong ito din ang tanong ko sayo Naaalala mo ba o naisip kayang tawagan ako Binabasa mo kaya mga dating mensahe sa iyo.
Gusto kong sagutin ang tanong na ito Ng masabi ko ng deretsahan sayo Lahat ng masasayang sandali'y ikaw ang karamay ko Na kahit ulit uliti'y ikaw pa rin ang pipiliing makasama ko.
Gusto kong tanungin mo ako kung gusto pa ba kita Aamin ako sayo at hindi magdadalawang salita Sasabihing ikaw lang at walang pumalit na iba Noon at ngayon, tayo lang dalawa.
Gusto kong sagutin ang tanong na ito Ipagsisigawan ang malakas kong Oo Sabay yakap ng mahigpit sa katawan mo Ngingiti pagkat alam nating wala namang nagbago.
Gusto kong tanungin mo ako kung mahal pa ba kita Tatawanan at sasabihing nababaliw ka na ba Bakit paulit ulit mong tinatanong ang mga salita Kung sa una palang puso ko'y hawak mo na.
Gusto kong sagutin ang tanong na ito Ipipinta pa upang laging maalala mo Mahal kita walang labis, walang kulang, buong buo Mahal kita uulit ulitin para marinig ng iyong puso.
Gusto kong tanungin mo ako kung okay ako, kung okay na ba ako Tatalon at sasalubingin ka ng mga halik ko Di mo maiisip na may hinahanap pa ako Okay na ako, maayos na ang lagay ng puso ko sayo.
Gusto kong sagutin ang mga tanong na ito Para saan? Para sa ano? Para hindi mo maisip na kailanman ako ay isuko Na hanggang sa huli pipiliin mo ako, pipiliin mo pa rin ang tayo.
Kaya tama na, sasagot na ako Di ko na nga hihintayin pa mga tanong mo Dahil ang gusto ko, sabay na tayo Mangangako ng pag-ibig habang magkadikit ang ating mga noo.
Nasaan na? Kumain ka na ba? Anong iyong ginagawa? Kumusta na? May gusto ka ba? O mahal pa ba kita? Iilan lang yan sa tanong na akala mo walang kasagutan na.
Itanong mo lang, handa naman ako Sasagot ng buong tapang sa iyo Na ikaw ang naging sagot sa lahat ng mga dasal ko At ikaw lang ang minahal, minamahal at ang mamahalin ko.
