Si Mama At Si Tatay

Prompt: Inay, Itay Mahal Kita

Group: ADN Tinta

Team: Good Vibes Lunes

Si Mama at Si Tatay

Mama...

Yan ang nakalakihan kong tawag sa kanya

Siya na taga gising ko tuwing alas singko ng umaga

Naghahanda ng almusal kahit napipikit pa ang kanyang mga mata

Siya na namamalengke at kuripot kung tumawad ng paninda

Upang sa bawat pisong matipid may pambili ako ng buko sa suking tindera.

Siya na hindi nagrereklamo kahit gabundok ang kanyang labada

At kahit na nga nagkakasugat pa ang mga daliri sa mga kamay niya

Siya yung babaeng panay ang linis sa munting tahanan kahit sahig ay nangingintab na

At kahit na sabihin kong tutulungan namin sya, sumasagot lang ng “kaya ko ‘to ng mag-isa”.

Siya yung babaeng naging unang kaibigan ko bago ang iba

Ang taong katsismisan ko sa bawat madidinig na balita

Ang taga puna kung damit kong suot ay di swak sa kanyang panlasa

At ang alalay ko kahit saan ko yakaging magpunta.

Yung tipong taga cheer ko pag may mga pagsubok akong dinadala

At taga bigay ng batok at kurot pag naiinis na sa mga desisyon kong hindi na tama

Siya yung taong nasasaktan bago pa luha’y mahulog sa aking mga mata

At nauunang lumulundag sa tuwa pag alam niyang puso ko’y punong puno na ng saya.

Tatay...

Alam kong hindi tugma ang tawag ko sa kanila

Pero siya yung katuwang ni mama sa pagpapalaki at pag aaruga

Iyong lalaking kahit may sakit ay hindi pwedeng magpahinga

Rason niya kasi mababawasan ang baon namin sa iskwela.

Siya yung taong matiyagang naghihintay sa aking pag-uwi

Yung taong di napapagod sumundo sa akin kahit na kalagitnaan ng gabi

Yung kadiskusyon ko sa mga temang pampulitika

Pero laging sumusuko kasi dahilan nya’y mas matalino daw ang anak sa ama.

Siya yung taong naging una kong kalaro’t kasama

Kahit pa nga sa pagpapalipad ng mababaw kong saranggola

Ang nagturo sa akin kung paano lumangoy at sumakay sa bisikleta

At bumaril ng ibon habang nakadapo sa aming punong mangga.

Siya yung hari at ako ang kanyang prinsesa

Siya yung tagapagtanggol ko kapag sa dilim ako’y nanginginig na

Siya yung kawal kong sinusuong ang laban ng aming pamilya

At ang lalakeng pinapangarap ko ding mahanap sa iba.

Kaya naman sa araw na ito, hayaan ninyong ipagmalaki ko sila

At hayaan ninyong kahit sa simpleng tula sila ay aking maipakilala

Kahit kasi araw-arawin ko ang pasasalamat ko sa kanila

At paulit-ulit sabihin ang salitang "mahal kita", kulang ito para sa sakripisyong walang reklamong bigay nila.