Sinungaling Ako
Sinungaling Ako
Naniniwala ako na musmos pa lang tayo kilala ka na ng puso ko
kinilala kita ng buo
minarkahan
minahal ng patago –
ikaw yung pinangarap kong makasama sa pagtanda
iyong taong alam kong hindi ipinagdamot ng tadhana
iyong sinibat ni kupido ng kanyang mahiwagang palaso’t pana
at inihain sa akin ng engkantong natisod ko nung ako’y munting bata
naniwala ako
nangarap
umasa –
Paano ba namang hindi?
kung sa bawat pagsikat ng araw
sa bawat paglubog ng buwan
sa paglipas ng bawat gabi
nandoon ako, nandoon ka
buntot natin ang isa’t isa
di mahiwalay sa paningin
busog tayo sa atensyon at pansin
noon pa lang, alam ko na ang ibig sabihin ng saya
ng masaya tayo sa dimensyong nalikha
ng
ikaw
ako
tayo –
Lima, sampung taon, isang dekada ang nagdaan
napadpad tayo sa mundong puno ng pagka-kaibigan
doon sa palihim tayong may unawaan
doon sa walang opisyal na tawagan
doon sa naghihintay na may mauunang aamin ng nararamdaman
doon sa tahimik tayo pareho pero mahigpit ang mga yakapan
doon sa buo na ang araw ko sa ‘good morning’ mo pa lang
doon sa ubos ang load kakatext at sa mahabang kamustahan
doon kung saan nanatili kang kawal na handa akong protektahan
kahit pa nga paulit ulit mo sa aking pinaparamdam
na hindi ako katulad ng isang ordinaryong prinsesa
doon sa mga pelikula at sa mga librong nababasa
para kasi sa’yo, mandirigma din ako
malakas, matatag kayang iligtas ang sarili ko
kahit na walang tulong na galing sa kung sino
nandoon tayo
nandoon parin tayong dalawa
oo, tayong dalawa
nanatili tayo
kumapit pareho –
Hanggang sa dumating siya,
siya na maganda
siya na matangkad
siya na tuwing nahihiya
parang prutas ng makopa ang pisngi niya sa pula
siya na mahina
siya na nangangailangan ng pagsagip at kalinga
siya na bagong mukha
siya na niyakap nating pareho
dahil kailangan niya rin ng kaibigang tulad ko
katulad mo –
Masaya ako sa pagdating niya, oo
may mapapagsabihan na ako ng mga sikreto ko sa iyo
may makakasama na ako sa mga hagikgikan tuwing kinikilig ako
may kakutsaba na ako sa mga surpresa ko sayo tuwing kaarawan mo
may bagong kaibigan ako
may kaibigan na naman ako –
nakakatawa
nakakatawa kasi doon ko napatunayan na talagang mabait ka
doon ko napatunayan kung bakit mahal kita
at bakit mas lalong minahal kita
sinasamahan mo kasi siya tuwing wala siyang kasama
hinahatid mo at ipinapasundo mo nalang ako kay kuya
kapag alam mong siya lang mag-isa at may pupuntahang lakad na mahalaga
natutuwa ako tuwing tatanungin mo ako kung ako’y kumain na
sabay hanap sa kanya at yayaing isama natin siyang dalawa
sa lahat ng iyon sige lang
okay lang ako
okay pa ako
okay na okay pa ako –
Okay pa sana ako
kung hindi ko lang naramdaman na unti unti
paunti – unti
parang may nahahati
parang may nagnanakaw sa dati kong pagmamay-ari
parang may mali
tama, parang may mali
akala ko noon ang dating dalawa
madadagdagan ng isa
ang dating mundo ng ikaw at ako
magiging mundo ng tayo
akala ko may mabubuong tatsulok
akala ko lang pala pagkat ito’y tuluyang nabulok
dahil mahal, mula’t sa simula walang tatlo
walang tatlong nabuo
kahit anong bilang ko sa mga daliri ko
walang nasa una
walang nasa gitna
walang nasa dulo
nanatiling dalawa yung nandoon sa mundo mo
sinubukan kong hanapin doon ang sarili ko
hanapin ang nawawalang ako
ang karakter na nawala sa eksena
yung karakter na pinalitan ng bagong bida
hinanap ko
maniwala ka hinanap ko
ngunit may nabago
may pumalit na bago
may bago –
Inalam ko kung saan ako nagkulang
inalam ko kung saang banda ang hindi ko napunan
oo, inaamin ko sinungaling ako
nagsinungaling ako sa’yo
nagsinungaling ako nung sinabi kong nakakatuwang may bagong mukha sa ating mundo
pero ang totoo madamot ako pagdating sa pagmamahal mo
nagsinungaling ako nung sinabi kong masaya akong may kahatian ako ng sikreto ko sayo
pero ang totoo natatakot akong baka mahulog din siya sayo
nagsinungaling ulit ako nung sinabi kong masayang may humahagikgik din sa kilig ko
pero ang totoo kinakabahan ako na baka mainggit siya sa sayang ramdam ko
nagsinungaling ako, oo
isa, dalawa, tatlo.. maraming beses
paulit ulit..
kahit masakit –
oo, sinungaling ako
dahil hindi okay sakin na samahan mo siya
hindi okay sa akin na ihatid mo siya
hindi okay sa akin na kasama siya habang kumakain tayong dalawa
hindi okay sa akin na espesyal din ang turing mo sa kanya
na yung bestfriend ko, bestfriend na din niya
na yung mahal ko parang mahal na din niya
hindi okay sa akin
hindi okay sa akin, mahal
hindi okay –
Pero wala akong nagawa
wala, wala akong magawa sa aking nadarama
kahit hindi ko na kaya
kahit gusto kong sabihin sayo na ako naman ngayon yung mahina
na kapareho din ng iba
kapareho niya
kailangan kita
kailangan din kita
kailangan ulit kita
na hindi tulad ng iyong paniniwala
minsan din akong nagiging tipikal na prinsesa
kailangan ko din ng sagip mula sa prinsipeng mahal niya
ako na muna
ako nalang muna
ako nalang muna ulit
gustong gusto ko itong hilingin sa iyo ng nakapikit
ng hindi naman mahulog ang mga luha ko dahil sa sakit
doon sa araw araw na pakikipagdigma ko sa hapdi at pait
doon sa kirot
doon sa gulo ng mundo nating masalimuot
Patuloy na nagbabadya yung ulan
hindi ko na nga alam kung lalakas ba o mananatiling ambon lang
kung magpapakita pa ba ang araw
kung babalik pa ang isang naligaw
kung magigising pa ba ang isang ikaw
naghihintay ako ng hudyat ng tama na
ng babala na masyado na akong umaasa
ng balita kung nasaan ka na ba talaga
kung nasaan ka na
kung nasaan na ang dating abot kamay at tingin lang ng aking mga mata
ang hirap kasing masanay doon sa tayong lang dalawa
doon sa dating hindi ko naramdaman ang mag isa
doon sa dating pinalimot mo kung paano ang mag isa
gusto kong marinig sayo kung hanggang dito nalang talaga
yung istoryang nasa gitna pa lang pero patapos na
sunduin mo naman ako dito sa ereng napag iwanan mo
dito sa sulok ng lirikong ‘oo, hindi nga pala tayo’
hanapin mo ako saka pakalawan doon sa mga naburang pangako mo
dahil mahal, masakit na
sobrang sakit na –
hindi ko na kaya
hindi na
hindi ko na kayang mamangka dito sa kalsada
kung saan hindi na nga ako umuusad,
nagmumukha pa akong baliw at tanga –
