Dota Ba O Ako?
Prompt: Biro
Group: ADN Tinta
Activity: Good Vibes Lunes
Dota Ba o Ako?
Doon sa may labasan sa may kanto
Malapit doon sa may nagtitinda ng mga puto
At may mga nakatambay na sanggano
At mga nakakatakot na lasenggero
May isang munting kuwarto
Na nagsilbing saksi ng aming pagtatagpo
Abala siya noon sa kanyang paglalaro
Kung saan tutok siya at ayaw paistorbo
Doon, doon ko siya naunang biniro
Kung may ibubuga ba siya o lahat lamang ay pakitang tao
Tumahimik lang siya at ayaw kumibo
Kahit na nga mata’y may parang inis na namumuo.
Hindi ko alam pero araw araw kong kinulit ang ginoo
Natutuwa kasi akong makita ang gitla niya sa noo
Pati ang pagsasalubong ng dalawang kilay niyang malalago
Wala akong pakialam kung matalo siya sa bawat niyang laro
Kung maubos ang pera niyang sa bulsa ay nakatago
Basta mabiro ko lang siya, hay!, buo na ang araw ko.
Ganito ang naging mukha ng araw ko linggo linggo
Sisilip ako sa ‘tagpuan’ namin kahit ilang minuto
Kukulitin, bibiruin ko siya ng may ngiti sa mga labi ko
Papanoorin ko ang paglalaro niya ng patago
Hindi ko lang kinaya ng sumagot siya ng "Ikaw, suko na ako"
Ng minsan ko siyang tanungin at biniro kung "Dota ba o ako?".
