Tan-Gee-Ey

Note: This poem was written as per request by one of my closest friends whom I met through Twitter. This one's for you Girl. I hope that all of my advice makes sense and some day, when that one day comes. I really hope you'd find your happiness, that real happiness. I wish and I pray to God that He may guide you in finding that real man who can stand by your side no matter what happens and who can love you wholeheartedly without a doubt and without looking into your past. You deserve no less. You deserve the best! First and only choice. You have a beautiful soul. Always remember that. I love you and thank you for the friendship.

We may be miles apart, but I am always here. Will always will.

Tan-Gee-Ey

Para ito sa puso kong may kutsilyong nakabaon

Para sa mga sugat ko na nanatiling hindi pa rin naghihilom

Kahit na nga dumaan pa ang napakatagal na panahon

Pagkat sa bawat panghihinayang ko’y nanatili kang nandoon.

Mahal, hindi kailanman naging madali yung kwento kung paano mo ako minahal,

Nasaktan, sinukuan, napalitan

Paano mo ako iniwan ng walang paalam

Paano ka lumisan at hindi nagawang magparamdam

Paano ka biglang muling lumitaw sa gitna ng kawalan.

Pero mahal, wala ng mas hihirap pa nung patuloy akong umasa

Na baka sakaling may tsansa pa

Na baka may natitira pang pag-asa

Umasa ako na baka may pwede pa tayong balikan

Umasa ako na baka pwede pa nating muling dugtungan

Yung dating alam kong kahit papaano merong nagdaan

Alam kong kahit papaano meron naman~

Umasa ako mahal~

Sabi ko,

This time…

Baka tama na yung panahon

Baka sakali tama na yung pagkakataon

Alam kasi ng Diyos kung ilang ulit kong hiniling sa kanya na ibalik ka noon

Upang minsan pang pang masabi kong mahal pa rin kita hanggang ngayon

Pero bakit ngayong nandito ka na

Ngayong ibinalik ka na niya

Bakit parang lalong naging mas malabo?

Bakit parang lalong mas nadudurog ang puso ko?

Bakit parang lalong mas dumadami ang mga dasal ko?

Bakit parang lalong mas dumadami ang mga gusto ko?

Ang mga gusto ko

Ang mga gusto ko~

Tulad ng makita mo ang dating tayo

Makita mo ulit ito~

Ang sagipin mo ulit ang puso ko

Ang sagipin mo naman ako~

Kasi mahal nilayasan na ako ng buhay ko

At yung sakit namahay na yata sa dibdib ko

Mula nung niligaw mo yung ‘tayo’

Mula nung may nahanap kang kapalit ko diyan sa puso mo

Nung iniwan mo ako

Nung iniwan mo ang lahat sa mundo

Nung bumalik ka na parang walang nangyaring magulo

Gusto kong sagipin mo ako

Ako na muna yung sagipin mo

Mahal, utang na loob

Pagsagip mo ang kailangan ko.

Oo, sige..

Marahil mahal parehas lang tayo

Biktima ka, biktima ako

Biktima tayo ng isang tadhanang nagkamali ng pinatagpo

Pero mahal sinubukan ko

Sumubok ako sayo

Nung humingi ka ng isa

Binigyan kita ng dalawa

Nung hinawakan mo ang kamay ko

Yakap at halik ang naging sagot ko

Nung hiniling mong huwag akong umalis sa tabi mo

Nandoon lang ako,

Nandoon ako.

Kaya sa pangalawang pagkakataon

Umasa ako na maaayos na

Akala ko maaayos pa

Akala ko pwede na

Akala ko pwede pa

Akala ko tama na ang lahat

Akala ko ang isa’t isa pa rin yung hanap

Akala ko may pag asa na

May pag asa pa

Pero nanatiling wala

Sa iba pa rin talaga

Hindi pa rin ako ang huli’t dulo mo

Kahit ako naman ang mas nauna diyan sa puso mo.

Mahal, oo naniniwala ako na kailangan mo ako

Na kailangan mo pa ako

Pero bakit kahit kasabay kitang tumakbo

Bakit mas nauuna yata ako

Kasabay naman kitang sumisisid

Pero bakit mas lumulutang ako

Kasabay naman kitang nanaginip

Pero bakit tuwina wala ka sa paggising ko.

Dahil mahal, para saan pa yung pagbabalik mo?

Para saan pa yung muling pagpaparamdam mo?

Hahawakan mo lang pala ulit ang kamay ko para bitawan

Sasamahan mo lang pala ako ulit para muling iwanan

Pasasayahin sandali para bigyan ng sangkaterbang kalungkutan

Yayakapin para lang may maitulak kalaunan.

Ganito ba ang sukatan kung paano mo ako suklian ng pagmamahal

Yung paulit ulit mo akong saktan

Yung paulit ulit kahit sa magkakaibang paraan

Kahit sa magkakaibang dahilan

Oo, alam kong parehas tayong marunong magmahal

Pero bakit mas lasog lasog yata yung aking katawan?

Oo, nasaktan din kita noon

Pero mahal naman

Bawing bawi ka sa nararamdam kong sakit ngayon

Bawing bawi ka na ngayon~

Mahal, nakakapagod ka

Nakakapagod ang mahalin ka

Napapagod na din kasi akong maging tanga

Napapagod na din ako sa sermon ng iba

Oo, marahil sa pag ibig pwede akong tumigil

Humingi ng pahinga

Umupo saglit kapag nahahapo na

Pero mahal,

Di ba dapat ang pag ibig ang mismong pahinga?

Di ba ikaw dapat ang aking pahinga?

Oo, naniniwala ako na may mga lugar na dapat matagal ko nang nilisan

May mga bagay na noon pa man dapat ko nang iniwan

May mga kwento na hindi naman na dapat inaabangan

At may mga taong kinakailangang sa gitna pa lang dapat ko nang binitawan

Pero mahal, bakit pagdating sa’yo nanatili akong nagtatanga – tangahan?

Kasi mahal sa dinami dami ng rason na pwede na kitang bitawan

Na ayoko na kitang muling ipaglaban

Mayroon isang bahagi dito sa puso ko ang nagpapasyang kumapit pa

Na kaya ko pa ~

Na duwag ako pag sinabi kong ‘tama na’

Kasi kahit nasa akin ang puso ko

Sa tuwing nagtatalo kami ng dahil sa iyo

Lagi itong nauuwi sa panig mo

Lagi itong umuuwi sa’yo

Laging sayo.

Bakit ako?

Nanahimik na ako pero minsan mo pa akong ginulo

Kinausap mo ako ng magdamag

Na parang wala ng bukas sa mundo mo

Pinaramdam mo sa akin na mahalaga ako

Na mahalaga pa ako

Na minsan mo pa akong kailangan sa buhay mo.

Bakit? Bakit ako nagkakaganito?

Bakit nananatiling ikaw ang sigaw ng puso ko?

Bakit? Ano bang meron sa’yo?

Bakit ikaw pa rin ang hanap nito?

Bakit mahal kita ng sobra

Pero yung sa sarili ko kulang kulang na

Bakit hindi ko mabuksan ang puso ko sa iba

Bakit nakakulong pa rin ako sa nakaraan nating dalawa

Bakit mahal pa kita?

Bakit mahal pa rin kita?

Bakit hindi yun nawala?

Mahal,bakit ikaw pa rin sa kabila ng kaguluhang ito

Oo, ikaw parin kahit hindi na ulit magiging ako.

Mahal pagbibigyan kong muli ang sarili ko

Pagbibigyan kita na huwag muna kitang iwanan sa puntong ito

Pero mahal sana huli na ito

Matuto kang mamili mahal ko

Kung ako, ako

Kung iiwan mo ako, iwan mo na ako

Kasi hindi ganun kadali ang lahat

Na sa paglisan mo mawawala ang bigat

Hindi ito simpleng pagkahati lang ng daan

Na pwede akong pumili kung kaliwa o kanan

Bigyan mo naman ako ng tsansang lumaban

Kailangan ko rin naming lumaban

Hindi yung ako nalang yung puro sugatan

Kasi mahal sa totoo lang ayokong dumating tayo

Doon sa oras na magsisi tayo pareho

Sana sa panahong pwede na ay pwede pa

At sana sa panahong kaya mo na ay kaya ko pa.

---