Traje De Boda

Traje De Boda

“Kukunin kita katulad nila,

Kukunin ko din ang iyong kaluluwa katulad ng mga nauna”

Yan ang sigaw sa akin ng misteryosang babaeng naka-traje de boda

Kasabay ng kanyang halakhak at nanlilisik niyang pulang mata.

Ako’y nagmakaawa sabay hingi ng tawad sa pagkakamaling nagawa

Pinilit ko siyang mapaniwalang kinain lang ako ng makamundong pagnanasa

Ngunit naging bingi siya sa kanyang naririnig

Habang papalakas ng papalakas naman ang tibok sa aking dibdib

Dahan-dahan niya ulit akong nilapitan doon sa kuwartong aming kinaroroonan

Hawak niya pa ang pinangsaksak na punyal na kumikisplap sa kadiliman

Sambit niya, “Bago kita dalhin sa impyernong iyong paglalagakan

Hayaan mong ikwento ko sa iyo ang sikretong ako lang ang may alam”

“Masaya at marangya ang naging buhay ko sa mundong ibabaw

Lumaki sa luho at lahat ay binibigay ng aking mga magulang

Kaya nung sinabi ko sa kanilang may lalaki akong napupusuan

Hindi na ako nagulat na nagawan nila ng paraan na ako’y kanyang pakasalan”

“Hindi tumagal dumating yung pinakahihintay kong araw

Ang maka-isang dibdib ang lalaking mahal sa harap ng altar

Suot ang traje de bodang galing pa sa ibang bansa

At pinasadya para maging maganda sa harap ng madla”

“Ako ang mukha ng pinakamasayang babae nung araw na itinakda

Lulan ng sasakyan papunta sa lugar na pagdadausan ng aming pulot-gata

Ngunit ang abot tengang ngiti ay dagli-dagling napawi

Ng mapagtantong sa isang lumang bahay sa gitna ng gubat kami ay nagawi”

“Limang kalalakihan ang sa amin ay sumalubong

Agad tinalian ang aking kamay gamit ang lubid na pinagugtong

Titig ko'y naging mapagtanong, utak ko'y unti unting nilason

Nang makita ang asawa ko na nakikipagtapikan sa mga taong mukhang binayarang hoodlum"

"Idiniretso ako sa isang silid, puro alikabok ang makikita sa paligid

Inihiga akong patihaya sa may kama, iginapos ang kamay at paa

Nag-ingay ako, humingi ng saklolo, Nagwala, bumuhos ang aking mga luha

Lalo na nang makita ko ang lalakeng kanina lang pinakasalan kayakap ang aking pinsan na tinuring kong matalik ng kaibigan”

“Doon, doon nila binulgar na dahil sa kagustuhan kong mahalin ako ng lalaking mahal ko

Nasira ko ang relasyong matagal na nilang itinago

Kaya’t sa araw ng kasal ko ay pinagplanuhang patayin ako

At kuhanin ang anumang kayamanang nailipat na sa pangalan ko”

“Wala akong nagawa nang tuluyang tumalikod na ang dalawa

Kayo na ang bahalang iligpit siya, utos pa nila sa lalakeng lima

Mukha ng demonyo ang siyang aking nakita

Ng ngumisi agad ang isa sabay tanggal ng suot niyang kamiseta”

“Halinhinan nila akong ginahasa, nagpapasasa, nagpakasawa

Pinaso nila ako ng sigarilyo, sinasabunutan ang sabog sabog na buhok ko

Tinawan, ininsulto. Sinira nila ang aking pagkatao

Ginamit nila ako habang suot suot ang traje de bodang nagsilbing kamatayan ko”

“Isang patalim ang nahagilap ng kamay ko nang mapagod ang mga lalaking nasa tabi ko

Isang sumpa ang sinambit ng mga labi ko bago itinarak ang sandata sa may dibdib ko

“Kukunin ko ang kaluluwa ng bawat lalakeng mahuhumaling sa katawan ko

Kukunin ko ang kaluluwa ng mga ito kapalit ng pagnanasa nila habang ang traje de boda’y suot ko”

“Oo, nasa impyerno na ang limang lalakeng naging dahilan ng paghihiganti ko

At titigil lang ako kapag kaluluwa na ng asawa ko ang kaharap ko”

Pero sa ngayon, kamatayan mo muna ang siyang ihahatid ko

Pagwawakas ng babaeng misteryoso sa nakakapangilabot nitong kwento.

---